Rúmlega 1.400 starfa hjá fyrirtækjum í Grindavík

• Fréttir
• 22. janúar 2026

Tæplega 800 manns voru að störfum í Grindavík þann 7. janúar síðastliðinn samkvæmt könnun sem atvinnuteymi Grindavíkurbæjar framkvæmdi. Markmið könnunarinnar var að öðlast betri innsýn í umfang atvinnurekstrar í bænum og stöðu starfsemi fyrirtækja.

Að þessu sinni var jafnframt óskað eftir upplýsingum um heildarfjölda starfsfólks fyrirtækjanna í Grindavík. Samkvæmt þeim upplýsingum starfa alls 1.410 starfsmenn hjá fyrirtækjum í Grindavík. Munurinn á þessum tölum má meðal annars skýra með því að ekki eru allir starfsmenn við störf á sama tíma. Þar má nefna þætti á borð við vaktavinnu, hlutastörf, veikindi, orlof og aðra fjarveru. Niðurstöðurnar gefa því bæði mynd af raunverulegri viðveru starfsfólks í bænum á virkum degi og heildarstærð atvinnulífsins í Grindavík.

Eingöngu fyrirtæki með starfsemi í Grindavík

Könnunin var send til fyrirtækja sem vitað var að væru með starfsemi í Grindavík. Í kjölfarið var haft samband símleiðis við þau fyrirtæki sem ekki höfðu svarað, til að tryggja sem heildstæðastar upplýsingar. Könnunin náði eingöngu til þeirra starfsmanna sem mæta til vinnu í Grindavík, en ekki þeirra sem vinna fyrir grindvísk fyrirtæki utan sveitarfélagsins. Einnig eru starfsmenn fyrirtækja með skráð aðsetur utan Grindavíkur ekki taldir með, svo sem verktakar sem vinna við varnargarða eða utanaðkomandi þjónusta fyrir fyrirtæki í sjávarútvegi. 

• Síðast uppfært: 22. janúar 2026