Heyrum í vinum og nágrönnum! Viltu koma með til Grindavíkur?

• Fréttir
• 11. október 2025

Í dag lýkur Viku einmanaleikans, en þörfin fyrir hlý orð og boð um samveru heldur áfram alla daga. Við hvetjum öll sem eru á leið á viðburði í Grindavík að heyra í vinum og nágrönnum og bjóða með sér.

Við minnum á að mörg vilja sækja viðburði í Grindavík en hafa af einhverjum ástæðum ekki möguleika á að koma sér þangað sjálf eða þurfa stuðning. Lítill greiði, eins og að bjóða far eða boð um göngutúr, getur skipt sköpum fyrir mörg okkar.

Einnig er gott að minna krakkana á að taka vin með sér á viðburði, til dæmis á íþróttaleiki, því samvera smitar jákvæðni út frá sér.

Á vef Viku einmanaleikans má finna frekari upplýsingar, hugmyndir og hvatningu til að rækta tengsl og auka samveru í daglegu lífi.

Við Grindvíkingar vitum að sterkasta afl okkar liggur í samheldni, samkenndinni og tengslunum sem binda okkur saman. Það er þessi kraftur sem heldur okkur uppi og gerir samfélagið okkar einstakt.

Við erum Grindavík!

• Síðast uppfært: 11. október 2025