Keppt í hjólaskautaati í Grindavík

• Fréttir
• 29. september 2025

Laugardaginn 4. október verður áhugaverður íþróttaviðburður í íþróttahúsinu í Grindavík þegar þar fer fram keppni í hjólaskautaati (roller derby). Húsið opnar kl. 11:00 og verður leikið fram eftir degi.

Eina íslenska liðið í greininni, Ragnarök, mætir tveimur öflugum erlendum liðum: 301 Derby Dames frá Maryland í Bandaríkjunum og London Roller Derby Docklands Fight Railway frá Englandi. Um er að ræða svokallaðan þríhöfða, þar sem spilaðir verða þrír leikir á einum degi.

Fyrir þau sem ekki þekkja til hjólaskautaats er hér um að ræða háhraða snertiíþrótt og lofa forsvarskonur Ragnaraka spennu og mikilli skemmtun fyrir alla aldurshópa. Um er að ræða einstakt tækifæri til að upplifa íþrótt sem sem ekki er sýnileg Íslendingum á hverjum degi.

Grindvíkingar og gestir eru hvattir til að fjölmenna á pallana!

• Síðast uppfært: 29. september 2025