Tjaldsvæðið í Grindavík opnar föstudaginn 23. maí

• Fréttir
• 22. maí 2025

Tjaldsvæðið í Grindavík opnar formlega í fyrramálið, föstudaginn 23. maí. Svæðið hefur verið metið öruggt og tilbúið til að taka á móti gestum.

Tjaldsvæðið liggur utan við sprungubelti en engu að síður hefur farið fram ítarleg sjónskoðun á svæðinu af hálfu viðeigandi sérfræðinga. Engin ummerki um sprungur fundust. Þá hafa allar byggingar á svæðinu verið teknar út og samþykktar af byggingafulltrúa Grindavíkurbæjar og Heilbrigðiseftirliti Suðurnesja.

Öryggi gesta er ávallt í forgangi og verður staðan endurmetin tafarlaust ef breyting verður á hættustigi vegna jarðhræringa, í samstarfi við viðbragðsaðila og sérfræðinga.

Öruggt, fjölskylduvænt og vel búið

Tjaldsvæðið í Grindavík var tekið í notkun árið 2009 og býður upp á fjölbreytta og vandaða aðstöðu fyrir ferðafólk. Á svæðinu er rúmlega 200 fermetra þjónustuhús og 42 stæði fyrir húsbíla, fellihýsi og tjaldvagna.

Á svæðinu er fullkomin aðstaða til seyrulosunar og malbikuð og hellulögð bílastæði í innkomu tjaldsvæðisins. Tvö vel búin leiksvæði fyrir börn eru á staðnum, meðal annars með rólum, köstulum, kóngulóarneti og fleiri leiktækjum.

Í þjónustuhúsinu er aðstaða til matargerðar, sturtur, þvottahús og aðgangur að interneti. Allt er þetta til þess fallið að tryggja gestum þægilega og notalega dvöl.

Við hlökkum til að taka á móti ferðalöngum og bjóðum ykkur hjartanlega velkomin til Grindavíkur!

Verðskrá sumarið 2025

Innifalið er leiga á stæði, aðgengi að afþreyingu á tjaldsvæðinu, útigrill, salerni, sturta og seyrulosun.

Verð er eftirfarandi:

• 2.400 kr. fyrir 15 ára og eldri (gistináttagjald innifalið)
• Ókeypis er fyrir 14 ára og yngri
• 1.000 kr. fyrir 67 ára og eldri
• 1.500 kr. fyrir að tengjast rafmagni

Ekki er hægt að taka frá pláss

Gerðu meira úr heimsókn til Grindavíkur í sumar!

Í tengslum við heimsókn til Grindavíkur er tilvalið að skoða það sem bærinn hefur upp á að bjóða. Í Grindavík má finna veitingastaði, gistingu og afþreyingu. Kynntu þér það sem í boði er á visitgrindavik.is.

• Síðast uppfært: 22. maí 2025