Af neyðarstigi á hættustig vegna jarðhræringa á Reykjanesskaga

• Fréttir
• 2. apríl 2025

Ríkislögreglustjóri í samráði við lögreglustjórann á Suðurnesjum hefur ákveðið að færa almannavarnastig af neyðarstigi á hættustig vegna jarðhræringa á Reykjanesskaga.

Í tilkynningu frá lögreglustjóranum á Suðurnesjum kemur fram að engin virkni er sjáanleg í gossprungu sem opnaðist í gær um klukkan 9:45 suðvestan af fjallinu Þorbirni, norðan við Grindavík.   Enn logar þó glóð í nýju hrauni.  Að mati vísindamanna flæðir kvika enn inn í kvikuganginn.   Svæðið er óstöðugt og varasamt.  Talsverð jarðskjálftavirkni mældist í gær á Reykjanesskaga en í gærkvöldi tók að draga úr þeirri virkni en hún heldur þó áfram.

Hægt er að fylgjast með framgangi mála á vef Veðurstofu Íslands.

• Síðast uppfært: 2. apríl 2025