550. fundur bæjarstjórnar Grindavíkur haldinn í bæjarstjórnarsal að Víkurbraut 62, þriðjudaginn 9. janúar 2024 og hófst hann kl. 14:00.

Fundinn sátu:
Ásrún Helga Kristinsdóttir, forseti, Birgitta H. Ramsay Káradóttir, aðalmaður,
Hjálmar Hallgrímsson, aðalmaður, Helga Dís Jakobsdóttir, aðalmaður, Hallfríður G Hólmgrímsdóttir, aðalmaður, Birgitta Rán Friðfinnsdóttir, aðalmaður og Gunnar Már Gunnarsson, aðalmaður. 

Einnig sat fundinn:
Jón Þórisson, sviðsstjóri fjármála- og stjórnsýslusviðs. 

Fundargerð ritaði:  Jón Þórisson, sviðsstjóri fjármála- og stjórnsýslusviðs.

Dagskrá:

1.      Tjón á mannvirkjum vegna jarðskjálfta og landriss í Grindavik 2023 - 2312003
    Til máls tóku: Ásrún, sviðsstjóri fjármála- og stjórnsýslusviðs, Hallfríður, Hjálmar og Gunnar Már. 

Minnisblað frá Guðjóni Bragasyni og sviðsstjóra fjármála- og stjórnsýslusviðs lagt fram um að gerður verði samningur við NOVUM lögmenn um lögfræðiráðgjöf vegna bótamála. 

Bæjarstjórn samþykkir samhljóða að gerður verði samningur við NOVUM lögmenn á þeim grundvelli sem lýst er í minnisblaðinu og er bæjarstjóra falið að kynna fyrirkomulagið fyrir íbúum. 
         
2.      Fjárhagsáætlun 2024-2027 - Grindavíkurbær og stofnanir - 2307077
    Til máls tóku: Ásrún, sviðsstjóri fjármála- og stjórnsýslusviðs, Hallfríður, Birgitta Hrund, Gunnar Már, Hjálmar, Helga Dís og Birgitta Rán. 

Bæjarstjórn Grindavíkurbæjar hefur unnið að gerð fjárhagsáætlunar Grindavíkurbæjar fyrir árið 2024. Vinna við fjárhagsáætlunina hefur einkennst af samvinnu og samstöðu allra kjörinna fulltrúa og stjórnenda bæjarins. 

Undirbúningur fjárhagsáætlunar fyrir árið 2024 var vel á veg kominn fyrir rýmingu bæjarfélagsins þann 10. nóvember 2023. Mikil og góð vinna hafði verið lögð til verkefnisins, sem hafði meðal annars verið umfjöllunarefni á fundum bæjarráðs nr; 1650 (25.07.2023), 1651 (22.08.2023), 1652 (05.09.2023), 1653 (12.09.2023), 1655 (10.10.2023) og 1657 (24.10.2023) auk vinnufunda bæjarstjórnar í október. 

Fjárhagsáætlun fyrir árið 2024 hafði jafnframt verið vísað til fyrri umræðu á fundi bæjarstjórnar nr. 544 (31.10.2023). Samkvæmt markmiðum hefði síðari umræða átt sér stað fyrir árslok 2023 en vegna aðstæðna fékk bæjarstjórn frest. 

Ljóst er að forsendubrestur fjárhagsáætlunarvinnunnar er algjör og allar fjárhagslegar forsendur eru nú breyttar í rekstri Grindavíkurbæjar. Fjárhagsáætlun bæjarfélagsins og stofnana fyrir árin 2024-2027 er því sett fram með mikilli óvissu. Fyrir liggur að tekjur Grindavíkurbæjar muni dragast saman á árinu 2024 en kostnaður mun ekki dragast saman samhliða tekjutapinu. 

Sveitarfélagið getur ekki leitað í úrræði ríkisins vegna launa, því frumvarpið nær eingöngu til launafólks og atvinnurekenda á almennum vinnumarkaði, auk sjálfstætt starfandi einstaklinga að uppfylltum ákveðnum skilyrðum. Grindavíkurbær þarf því á eigin vegum að standa straum af launakostnaði starfsmanna Grindavíkurbæjar á meðan ástandið varir. 

Fjárhagsáætlun gerir ráð fyrir að leik- og grunnskóli muni starfa utan Grindavíkur fram á vor 2024 en að næsta skólaár muni starfsemin vera starfrækt í Grindavík eins og áður hefur komið fram. 

Umfram allt gerir fjárhagsáætlun ráð fyrir innviðauppbyggingu og viðhaldi til að tryggja öryggi bæjarbúa og stuðla að uppbyggingu samfélagsins með sem bestum hætti. Árið 2024 mun einkennast af viðaukum við fjárhagsáætlun vegna reksturs og fjárfestinga. 

Rekstur Grindavíkurbæjar hefur verið góður og ábyrg fjármálastjórn er bæjarfélaginu gott veganesti fyrir þá vinnu sem framundan er. 

Rekstrarniðurstaða A- hluta árið 2024 er halli að fjárhæð 241,5 milljónir króna. 

Í samanteknum reikningsskilum er halli að fjárhæð 371,6 milljónir króna, en við fyrri umræðu var gert ráð fyrir jákvæðri afkomu að fjárhæð 380 milljónir króna. 

Á árinu 2024 mun handbært fé lækka um 773,5 milljónir króna og verða í árslok 359,9 milljónir króna. 

Bæjarstjórn samþykkir samhljóða framlagða áætlun fyrir Grindavíkurbæ og stofnanir árin 2024-2027.
         
3.      Fundargerðir - Stjórn Samband íslenskra sveitarfélaga 2023 - 2302009
    Til máls tóku: Ásrún, Birgitta Hrund, Hjálmar, Gunnar Már, sviðsstjóri fjármála- og stjórnsýslusviðs, Hallfríður og Birgitta Rán. 

Fundargerð 940. fundar stjórnar Sambands íslenskra sveitarfélaga, dags. 15. desember 2023 er lögð fram til kynningar.
         

Fleira ekki gert. Fundi slitið kl. 15:50.

• Síðast uppfært: 9. janúar 2024