Vestnorden ferðakaupstefnan var haldin á Reykjanesi dagana 5.-7. október sl. Á Vestnorden koma saman ferðaþjónustuaðilar frá Íslandi, Grænlandi og Færeyjum og ferðaheildsalar víðs vegar að úr heiminum. Þá koma einnig til kaupstefnunnar blaðamenn og aðrir boðsgestir. Í tengslum við Vestnorden gefst ferðaheildsölunum auk þess kostur á að fara í kynnisferðir til landanna þriggja.
Vestnorden er haldin af Ferðamálasamtökum Norður-Atlantshafsins (NATA), sem er samstarfsvettvangur Íslands, Færeyja og Grænlands á sviði ferðamála. Vestnorden er haldin til skiptis af löndunum þremur, þar af annað hvert ár á Íslandi.
Grindavík var eftirsóttur staður að heimsækja í svokölluðum pre-tours eða ferðum sem farnar voru áður en sjálf kaupstefnan fór fram. Hingað voru farnar þrjár ferðir sem voru ýmist heimsókn í fjórhjólaferðir hjá 4x4 Adventures, í náttúruperlur eins og Gunnuhver eða að skoða handunnar vörur hjá VIGT og Kristinssyni. Þá fór einn hópurinn í matarsmakk á Fish House sem sló heldur betur í gegn en boðið var upp humarsúpu í forréttasmakk og síðan upp á nautasteik, djúpsteiktan þorsk og risrækjur. Með þessu var síðan boðið upp á íslenskan bjór.
Á VIGT fengu gestir að skoða úrval vara úr smiðju þeirra mæðgna auk þess sem um var að ræða fyrstu gesti í nýtt og stækkað húsnæði VIGT og 22.10 Brugghús. Gestir Vestnorden fengu að smakka bjór bruggaðan í heimabyggð og fannst gestum úrvalið mjög tilkomumikið og bragðið gott.
Áður en hópurinn hélt í Bláa Lónið var komið við á vinnustofu Vignis Kristinssonar Kristinsson – handmade. Þar tóku hjónin Vignir og Ólafía á móti hópnum sem var mjög hrifinn af handunnu vörunum og ekki síður húsinu sjálfu sem Vignir hefur sjálfur séð um að innrétta frá A-Ö.
Grindavíkurbær vill koma á framfæri sérstökum þökkum til þeirra fyrirtækja sem tóku á móti ráðstefnugestum hér í Grindavík. Móttökur þeirra skiluðu af sér sérlega ánægðum gestum sem flestir ef ekki allir hafa í hyggju að skipuleggja ferð til Grindavíkur.
Meðfylgjandi myndir voru teknar á þriðjudaginn sl. þegar hópurinn kom til Grindavíkur