Nýtt tímabil er hafið eða við það að hefjast hjá mörgum þeim félögum og stofnunum sem bjóða upp á skipulagt íþrótta- og tómstundastarf. Vakin er athygli á því að félagsmálaráðuneytið hefur framlengt sérstaka frístundastyrki fyrir börn sem búa á tekjulægri heimilum þar sem markmiðið er að jafna tækifæri þeirra til þátttöku í skipulögðu íþrótta- og tómstundastarfi. Hægt verður að sækja um styrkina við skráningu barns í tómstundastarf gegnum Sportabler. Prófanir á virkni Sportabler eru í gangi og stefnt er á að opna fyrir umsóknir í vikunni. UMFG er eitt þeirra félaga sem notar forritið til að halda utanum skráningar.
Ef verið er að skrá í námskeið sem ekki er með skráningarferli gegnum Sportabler má senda greiðslukvittun á netfangið tomstundastyrkur@grindavik.is eigi barn rétt á styrk. Þetta á t.d. við um tónlistarnám og dansnámskeið.
Hægt er að sækja sérstakan frístundastyrk fyrir börn sem fædd eru á árunum 2006-2015 og búa á heimili þar sem heildartekjur heimilisins voru að meðaltali lægri en 787.200 kr. á mánuði á tímabilinu mars – júní 2021. Styrkurinn er 25.000 kr. á hvert barn til áramóta.