Fyrirhugað er að uppfæra umferðaröryggisáætlun fyrir Grindavíkurbæ. Aðal tilgangur slíkrar áætlunar er að fækka slysum, beita forvörnum og leggja fram tillögur að úrbótum um það sem betur má fara í umferðinni.
Í þeirri áætlun sem síðast var samin segir meðal annars:
Líta ber á umferðaröryggisáætlunina sem leiðbeiningar frá stjórnsýslu og ráðgjöfum sveitarfélagsins. Þannig fá bæjarfulltrúar góða innsýn í stöðumatið og niðurstöður að verkefnum og forgangsröðun. Þannig geta bæjarfulltrúar forgangsraðið út frá eigin forsendum og samþykkt umferðaröryggisáætlunina að lokum og þannig tekið ábyrgð á henni. Umferðaröryggisáætlun er grundvöllur fyrir pólitískar ákvarðanir, hún myndar góðan grunn til að forgangsraða aðgerðum þannig að mestar umbætur náist fyrir minnst fjármagn.
Vinna við nýja umferðaröryggisáætlun verður á verksviði skipulagsnefndar Grindavíkurbæjar. Mikilvægt er að nefndin fái til liðs við sig áhugasama einstaklinga sem vilja beita sér fyrir bættu umferðaröryggi í bæjarfélaginu. Gera má ráð fyrir að haldnir verði einn til tveir fundir á ári vegna þessa verkefnis.
Hér með er þess óskað að þeir aðilar sem reiðubúnir eru til að starfa með nefndinni hafi sambandi við Atla Geir Júlíusson, sviðstjóra skipulags- og umhverfissviðs í síma 420 1100 eða í netfangi atligeir@grindavik.is