Mikil eftirspurn hefur verið undanfarin misseri eftir þjónustu dagforeldra í Grindavík. Daggæsla barna í heimahúsi er mikilvæg þjónusta gagnvart foreldrum barna sem hafa hug á því að snúa aftur á vinnumarkað við lok fæðingarorlofs. Þá er þjónustan ekki síður mikilvæg til að brúa bilið í þeim tilvikum sem börn verða 18 mánaða eftir að leikskólastarf hefst á haustin. 

Grindavíkurbær styður á margvíslegan hátt við starfsemi dagforeldra í sveitarfélaginu:

a) Með niðurgreiðslum gjalda (kr. 55.000,- fyrir hjón og kr. 65.000,- fyrir einstæða m.v. 8 klst. vistun)
b) Með auknum niðurgreiðslum gjalda vegna barna sem náð hafa 18 mánaða aldri
c) Með styrkjum til að sækja námskeið til verðandi dagforeldra og dagforeldra með bráðabirgðaleyfi
d) Með árlegum búnaðarstyrk til dagforeldra
e) Með því að leggja til húsnæði til útleigu fyrir starfsemi dagforeldra

Þrátt fyrir framangreindan stuðning sveitarfélagsins við starfsemi dagforeldra hefur ekki ákjósanlegur fjöldi daggæslurýma náðst í sveitarfélaginu. 

Bæjaryfirvöld hafa vilja til að styðja enn frekar við starfsemina með því að veita húsnæðisstyrk til þeirra sem sinna daggæslu í heimahúsi. Styrkurinn myndi nema kr. 15.000,- á hvert barn í daggæslu eða kr. 75.000,- m.v. fimm börn í daggæslu hverju sinni. Ef tveir aðilar myndu sameinast um daggæslu í heimahúsi myndi styrkurinn renna til þess aðila sem leggur heimili sitt til rekstursins. 

Með vísan til framanritaðs auglýsir Grindavíkurbær eftir aðilum til að sinna daggæslu barna í heimahúsi. Áhugasömum aðilum er bent á að hafa samband við Sigurlínu Jónasdóttur, daggæslufulltrúa hjá Grindavíkurbæ í síma 420-1100 eða á netfangið sigurlina@grindavik.is eigi síðar en 8. desember nk.

Reglugerð um daggæslu barna í heimahúsum má nálgast hér.

• Síðast uppfært: 22. nóvember 2017