Lesum saman

• Lautarfréttir
• 16. mars 2023

Kæru foreldrar.

Dagana 20.-31. mars 2023 verður verkefnið Lesum saman í leikskólum Grindavíkurbæjar og Hópsskóla og af því tilefni óskum við eftir samstarfi við ykkur. Rauði þráður verkefnisins er orðaforði, að lesa saman, foreldrar fyrir barn og/eða barn fyrir foreldra og skoða orðin í textanum og ræða um þau. Hver skóli setur upp verkefnið eins og hentar hverri stofnun og munu kennarar skólanna kynna fyrir sínum foreldrum hvernig þeir leggja verkefnið upp hjá sér. Læsi er eitt það mikilvægasta í námi hvers barns og góð orðaforðaþekking er mikilvægur hluti af læsi, til að skilja það sem við erum að lesa eða er lesið fyrir okkur þurfum við að þekkja orðin. Stefnt er að því að nokkrir viðburðir verða á þessu tímabili í tengslum við verkefnið og verða þeir kynntir síðar.

Einnig er Bókasafn Grindavíkur með okkur í verkefninu. Þar er opið frá kl. 12.30 -18.00 alla virka daga og viljum við benda á að bókasafnsskírteini eru nú ókeypis fyrir alla íbúa Grindavíkur og hvetjum við ykkur til að gera ykkur ferð á bókasafnið með barni ykkar, skoða úrvalið og velja saman bækur. Bókasafnið býður einnig upp á bækur á ensku og pólsku og þar eru líka til spil sem má fá lánuð heim yfir helgi. Það er ósk okkar að næstu 2 vikur veiti ykkur og börnum ykkar ánægjulegar samverustundir við lestur og umræður um það sem þið munið lesa

• Síðast uppfært: 16. mars 2023