Sigurganga Grindavíkurliðsins hélt áfram í kvöld þegar Grindavík vann öruggan 32 stiga sigur á ÍR á heimavelli, 103-71.

 

ÍR var yfir eftir 1. leikhluta, 24-25 en eftir það tók Grindavík öll völd á vellinum.  Í hálfleik munaði 12 stigum, 56-44 og eftir 3. leikhluta var staðan 78-55 og leikurinn endaði eins og áður sagði, 103-71. 

Allir fengu að spreyta sig og var m.a. gaman að sjá yngsta leikmanninn, Ólaf Ólafsson blokka glæsilega skot í vörninni og reyna svo í næstu sókn að troða yfir varnarmann ÍR en troðslan tókst reyndar ekki en gaman að sjá að sjálfstraustið er til staðar.

 

Steven Thomas styrkist með hverjum leiknum og réðu ÍR-ingar akkurat ekkert við hann.  Steven skoraði 39 stig, reif niður 11 fráköst og varði 2 skot.  Frammistaðan skilaði honum 47 stigum á leikvarpinu en í því er framlag leikmanna reiknað út.  Sjá má leikvarpið og aðra tölfræði inn á www.kki.is

Paxel fyrirliði skoraði 19 stig og tók 7 fráköst en fleiri komust ekki í 2-stafa tölu í stigaskorun sem segir allt sem segja þarf, allir nema einn skoruðu.  Palli Kristins var nálægt tvennunni, reif niður 10 fráköst en vantaði 2 stig upp á tvennuna.  Adam Darboe var ekki langt frá því heldur með 9 stig og 7 stoðsendingar, flottur leikstjórnandi þar á ferð sem eins og Steven, styrkist með hverjum leik.

 

Virkilega gaman var að fylgjast með liðinu og það er greinilega mjög góður andi innan liðsins og menn hafa greinilega gaman að því sem þeir eru að gera.

 

Búnir eru 4 leikir en þeir hafa allir verið á móti minni spámönnum deildarinnar en á fimmtudagskvöldið fáum við tækifæri á að sýna að við getum unnið þá stærri líka en þá sækjum við Íslandsmeistara Njarðvíkur heim í Ljónagryfjuna.  Gaman verður að sjá hvernig Steven tekst að eiga við Frikka Stef og Egil undir körfunni og ekki síður hvernig þeim tekst að eiga við Steven.

 

Áfram Grindavík!

 

Tekið af vef www.umfg.is