Flagghúsið í Grindavík endurbyggt.
Einungis er eitt hús ennþá uppistandandi af verslunarhúsum Einars kaupmanns
í Garðhúsum. Flagghúsið var áður íbúðarhús í Garðhúsum, byggt 1890 og síðar pakkhús
við Einarsbúð. Í dag er þetta hús upphaf skipulagðrar byggðar í Grindavík, enda
öll húsnúmer frá þessu húsi talin. Flagghúsið hefur gegnt margvíslegum verkefnum
meðal annars verið íbúðarhús, verbúð, samkomustaður, beituskúr, pakkhús, salthús,
veiðafærageymsla og netaloft. Auk þess er þarna sögusvið nóbelsverðlaunaskáldsins
og leiksvið kvikmyndarinnar ?Sölku Völku?. Þarna er uppspretta myndlistar málarans
Gunnlaugs Scheving enda miðja margra mynda hans. Nafngift hússins er komin af
flaggstöng sem var á vesturgafli hússins. Þar voru sjómenn varaðir við ef aðgæslu
var þörf á Járngerðarstaðarsundi. Þá var flaggað lóðabelgjum, einum, tveim eða
þrem, eftir því hversu slæmt sundið var. Eins var verkafólk kallað til með flaggi
þegar breiða átti saltfisk á þurrkreiti eða taka fisk saman.
Endurbygging.
Skipt var um þak, sperrur, bæði gólfin, fóttré og burðarbita bæði neðri- og efri
hæðar, einnig var skipt um klæðningu og stóran hluta burðarvirkis í gafli og hliðum
hússins. Grjóthleðslur sökkuls voru endurhlaðnar. Reynt var með sérstakri bæsun
að ná lit og áferð nýrra viðarhluta sem líkastan gömlu viðarhlutunum. Húsið var
einangrað að utan og klætt bárujárni líkt og áður var. Þannig eru innveggir hússins
sýnilegir, en þeir geyma byggingarlag hússins og sögu gengina kynslóða
sem skráð er á veggi hússins. Útlit glugga og gluggaskipan verður upprunaleg.
Sett verður flaggstöng á gafl hússins líkt og áður var.
Stefnt er að því að hýsa í Flagghúsi framtíðarinnar krambúð með menningar- og
sögutengda starfsemi sem sæmir merkri sögu hússins, byggðarlaginu, komandi kynslóðum
ómetanlegar minjar sem ekki má glata og þannig verða þannig lifandi sýningarsalur.
Lengi hefur verið ljóst að Flagghúsið er verulegt menningarverðmæti sem ekki
má glata og ber að varðveita í upprunalegri mynd.
Endurbygging Flagghússins hefur kosta verulegar fjárhæðir og ekki á eins manns
færi að standa straum að endurbyggingu þess. Herslumuninn vantar enn til að klára
húsið og gera fært í sýningarhæft stand.