Tap í Árbænum

• Íþróttafréttir
• 17. júlí 2012

Grindavík tapaði fyrir Fylki í úrvalsdeild karla í knattspyrnu í gærkvöldi 2-1. Leikbönn og meiðsli settu óneitanlega strik í reikninginn en Fylkir skoraði sigurmarkið úr vítaspyrnu. Daníel Leó Grétarsson sem er sautjánda ári kom inn í byrjunarlið Grindavíkur á síðustu stundu, skoraði mark Grindavíkur og er yngsti markaskorari Grindavíkur í efstu deild frá upphafi.

Alexander Magnússon og Scott Ramsey voru í leikbanni, Mikael Eklund meiddist í upphitun og Ameobi, Ondo og Jósef Kristinn Jósefsson eru allir meiddir, Marko Valdimar meiddist eftir hálftíma og þurfti að fara út af og í hans stað kom Pape M. Faey en hann er hálf meiddur. Þá eru Paul McShane og Páll Guðmundsson hættir.

Þrátt fyrir öll þessi skakkaföll skoraði Daníel Leó eftir 16 mínútur þegar hann fylgdi eftir góðu skoti Alex Freys Hilmarssonar. En Ingimundur Níels Óskarsson skoraði bæði mörk Fylkis, sigurmarkið kom úr vítaspyrnu á 85. mínútu eftir að Daníel Leó braut á leikmanni Fylkis sem var á leið út úr teignum.

Guðjón Þórðarson, þjálfari Grindavíkur, sagði þetta við Vísi eftir leik:

„Við hefðum átt að nýta sénsana okkar betur í leiknum. Ég er mjög svekktur því að við fengum marga sénsa til þess að klára þennan leik," sagði Guðjón.

Við hefðum átt að gera betur og klára þetta. Svo kemur vítaspyrnan í andlitið á okkur undir lok leiks og hún klárar þetta," bætti Guðjón við.

Grindavík hefur ekki gengið vel það sem af er Íslandsmótinu en Guðjón sagðist hafa trú á uppgangi sinna manna.

„Að sjálfsögðu hef ég trú á þessu. Það er augljóst að við stefnum á að gera betur í síðari umferðinni. Við erum búnir að lenda í miklum skakkaföllum, menn eru að meiðast og er það að há okkur," sagði Guðjón Þórðarsson að lokum.

Staðan er þessi:

1. KR 11 7 2 2 23:14 23
2. FH 10 6 2 2 28:12 20
3. Stjarnan 11 5 5 1 24:18 20
4. ÍBV 10 5 2 3 20:11 17
5. ÍA 11 5 2 4 18:22 17
6. Fylkir 11 4 4 3 14:19 16
7. Keflavík 11 4 3 4 19:16 15
8. Valur 11 5 0 6 16:15 15
9. Breiðablik 11 4 3 4 9:13 15
10. Fram 11 3 0 8 13:19 9
11. Selfoss 11 2 2 7 13:24 8
12. Grindavík 11 1 3 7 15:29 6

Mynd: Daníel Leó skorar í æfingaleik gegn ÍA í vor.

• Síðast uppfært: 17. júlí 2012