Fyrir 100 árum var hafist handa við gerð akvegar til Grindavíkur. Gönguhátíðin í Grindavík um verslunarmannahelgina (sjá nánar um hana hér) er tengd þessum sögulega viðburði en gamli Grindavíkurvegurinn var lagður á árunum 1914-1918. Hann var greiddur að hálfu úr ríkissjóði og að hálfu af Grindvíkingum. Þeir fjármögnuðu sinn hlut aðallega með lifrarpeningum.
Á fróðleikssíðunni Ferlir.is segir meðal annars:
„Verkstjórinn við vegagerðina var Sigurgeir Gíslason frá Hafnarfirði, reyndur vegagerðarmaður. Hann segir m.a. í skýrslu sinni 11. nóv. 1917 að vegurinn hafi alls verið 16 km og 120 m frá Vogastapa að verslunarhúsum við Járngerðarstaðavík í Grindavík. Við vinnuna voru 35-48 menn að jafnaði frá vori að hausti með 13-16 hesta. Í skýrslum hans er getið um alla þá er unnu við vegagerðina og hvað þeir fengu í kaup.
Meðfram veginum, frá Seltjörn að Grindavík, eru fjölmargar minjar vegavinnuframkvæmdanna, þ.e. búðir og skjól vegavinnumanna. Því miður var svæðið meðfram Grindavíkurveginum illa leikið þegar nýi vegurinn var lagður. Ekki er ólíklegt að þá hafi margar minjar hreinlega verið eyðilagðar af vangá.“
Sjá nánar hér á heimasíðu Ferlis.
Minjar frá vegavinnuframkvæmdunum fyrir tæpum 100 árum, rústir af búðum verkmanna.