Sífellt fleiri ferðamenn sem koma til Grindavíkur leggja leið sína á bryggjuna og skal engan furða enda mikil upplifun að sjá þegar verið er að landa úr bátunum. Í gær komu nokkrar rútur fullar af ferðamönnum sem fylgdust spenntir með þegar landað var úr Dúdda Gísla GK 48 tæpum 7 tonnum.
Höfnin virðist eitt helsta aðdráttarafl ferðamanna í bænum. Verið er að undirbúa merkingar og fræðsluskilti fyrir ferðamenn við bryggjurnar og skipuleggja göngustíga fyrir sumarið og því ættu ferðamenn að vera upplýstari um hvað fer fram á bryggjunum. Þetta ætti einnig að verða til þess að forða þeim frá hættum því oft er mikill hamagangur á bryggjunum þegar verið er að landa.
Myndir: Haraldur Hjálmarsson.
Birgir Hermannsson sjómaður, Benóný Þórhallsson útgerðarmaður og Halldór Einarsson sem fékk þennan fína steinbít í soðið.
Þeir voru hressir skipverjarnir á Dúdda Gísla.
Dúddi á fullu í lönduninni.
Steinunn SF 10 landaði í Grindavík í gær.