Eftirfarandi pistill birtist eftir Róbert Ragnarsson bæjarstjóra í 1. tbl. Járngerðar, fréttabréfi Grindavíkurbæjar, sem kom út á dögunum:
,,Í síðasta pistli Járngerðar fjallaði ég um mikilvægi þess að foreldrar og skólasamfélagið allt setti sér jafn háleit markmið í fræðslumálum og gert er í íþróttunum í Grindavík. Að árangur okkar verði á pari við þá bestu. Árangur í skólastarfi er hinsvegar ekki eins auðvelt að mæla og í íþróttunum. Í íþróttum er sá sem sigrar flesta leiki eða keppnir eða nær besta tímanum, með bestan árangur. Árangur er mældur í fjölda marka, stiga eða tíma. Í skólamálum og menningarmálum er ekki eins augljóst hvaða mæli-kvarða skuli leggja á árangur.
Þegar markmið eru sett og árangur metinn er mikilvægt að vita hvert maður ætlar. Hafa leiðarljós. Fyrir tiltölulega fáum árum síðan var Grindavík í 3. deild karla í knattspyrnu. Forsvarsmenn félagsins settu sér það leiðarljós að verða á meðal þeirra bestu. Til að þess að nálgast leiðarljósið var markmiðið í fyrstu sett á að komast upp um deild. Fáum árum seinna var liðið í úrvaldsdeild.
Grunnskóli Grindavíkur hefur sett sér slíkt leiðarljós:
Að skapa þannig umhverfi, í samráði við foreldra, að öllum líði vel og allir læri að bera virðingu fyrir sjálfum sér, öðrum og umhverfi sínu.
Að frá skólanum fari einstaklingar sem eru tilbúnir eru til að takast á við eigin framtíð.
Út frá leiðarljósinu þurfum við að setja okkur markmið sem eru mælanleg til að geta séð hvort við erum á réttri leið. Árangurinn getur verið metinn á kennslufræðilegum forsendum, svo sem í árangri í samræmdum prófum, lestrarhraða nemenda og lesskilningi eða hæfni í list- og verklegum greinum. Það er líka hægt að mæla hann út frá líðan nemenda og starfsfólks. Ólíklegt er að góður námsárangur náist ef nemendum og starfsfólki líður ekki vel. Það er líka hægt að mæla árangurinn út frá því hvernig nem-endum tekst að takast á við eigin framtíð eins og leiðarljósið gerir ráð fyrir. Hvernig gerum við það? Ein leið er að mæla hve margir nemendur ljúka framhalds-námi eða skara fram úr í atvinnu-lífinu annarsvegar eða feta slóð neyslu og glæpa hinsvegar? Það eru margir möguleikar og verðum við sjálf að velja þá.
Í menningarmálum á hið sama við. Það er ekki auðvelt að mæla árangur lista, nema kannski út frá árangri í söngkeppnum og sölu á hug- eða listaverkum. Mörgum þætti það þó heldur þröngt sjón-arhorn. Hvað er góður árangur í tónlistarnámi? Að Grindvíkingar eignist góða lúðrasveit, eða tónlistarmönnum í bænum fjölgi? Að sem flestir geti sungið eða spilað sjálfum sér til ánægju er líka árangur. Rétt eins og í skólamálum þurfum við sjálf að setja okkur markmið og mælikvarða á árangur.
Nú er menningarvika Grindavíkur að hefjast í fjórða sinn og dagskráin er fjölbreytt að vanda. Víst er að allir geta fundið eitthvað við sitt hæfi. Það er gaman að sjá hve margir Grindvíkingar taka þátt með beinum hætti. Það er sannarlega vitnisburður um metnað og árangur bæjarbúa í listum og öðrum menningartengdum greinum. Grindvíkingar státa af listamönnum á lands- og heimsvísu. Heiðursborgarinn Guðbergur Bergsson er rithöfundur á heimsmælikvarða en verk hans hafa verið þýdd á 19 tungumál. Sigvaldi Kaldalóns var og er eitt ástsælasta tónskáld þjóðarinnar. Þeir eru sannarlega dæmi um einstaklinga, hvor á sinni tíð, sem tilbúnir eru til að takast á við eigin framtíð.
Róbert Ragnarsson
bæjarstjóri"