Erfiðasti og dýrasti veturinn í snjóruðningi

• Fréttir
• 19. janúar 2012

Kostnaður Grindavíkurbæjar við snjómokstur í nóvember og desember er á sjöundu milljón króna. Sérstaklega var desember snjóþungur mánuður og að sögn Braga Ingvasonar í þjónustumiðstöðinni hefur hann aldrei lent í því, öll þessi ár hjá áhaldahúsinu, að þurfa að standa eins lengi í snjómokstri líkt og undanfarnar vikur.

Bragi segir að starfsmenn áhaldahússins og verktakar í bænum hafi haft í nægu að snúast í snjómokstrinum. Vissulega hafi verið mikið að gera í snjómokstri í upphafi árs 2008, sem mörgum er í fersku minni. En sú törn stóð yfir í skamman tíma en að sögn Braga er þessi vetur sá langerfiðasti sem hann rekur minni til í snjómokstri.  Og loksins þegar snjórinn var að mestu farinn um helgina bættist aftur í snjóinn síðustu daga og hefur þurft að grípa til snjóruðningstækjanna á ný.

• Síðast uppfært: 19. janúar 2012