Hrafn Sveinbjarnarson GK 255 kom til hafnar í Grindavík um síðustu helgi eftir 30 daga veiðiferð og mættu forráðamenn Þorbjarnar Fiskaness hf. með stóra rjómatertu til að fagna því að aflaverðmæti skipsins var það mesta frá upphafi í einni veiðiferð.

Að sögn Hilmars Helgasonar, skipstjóra, veiddust alls 665 tonn upp úr sjó miðað við slægðan fisk og er þá heildaraflaverðmæti 90 milljónir króna en hafði áður verið mest 88 milljónir króna.

?Það sem gerir þetta met hvað eftirminnilegast er hve aflinn er blandaður núna enda hafa verið bæði hækkanir á markaðnum og eins hefur gengið þokast verulega upp á við sem í raun var löngu kominn tími til,? segir Hilmar.

Skipting aflans eftir tegundum er eftirfarandi: Þorskur 120 tonn, ýsa 92 tonn, ufsi 270 tonn, karfi 145 tonn og 75 tonn af gulllaxi.

Hrafn GK 111, kom inn til Grindavíkur á mánudagskvöld með 90 milljón króna aflaverðmæti, en upp úr sjó er aflinn 610 tonn, einnig eftir 30 daga veiðiferð. Þar er metið um 110 milljón krónur svo það var ekki í hættu að þessu sinni. Áhöfnin unir samt vel við sitt en þar var afli einnig mjög blandaður eða 115 tonna af þorski, 80 tonn ýsa, 75 tonn ufsi, 270 tonn karfi og 45 tonn af gulllax. Við heimkomuna var Ómar Costaldo Einarsson, skipstjóri, kvaddur með gjöfum bæði frá áhöfn og útgerð en hann hefur stýrt skipinu frá því það komst í eigu Þorbjarnar Fiskaness hf. fyrir 7 árum. Hann lætur nú af störfum samkvæmt læknisráði eftir áralangt farsælt starf.

Gnúpur GK 11, þriðji frystitogari útgerðarinnar er svo væntanlegur á næstu dögum einnig með góðan afla.