Sigrún Ásta Haraldsdóttir er ein af hagyrðingunum sem tekur þátt í hagyrðingakvöldi í Kvikunni nk. laugardagskvöld kl. 20:00. Hún starfar á Upplýsingatæknisviði Landspítalans. Þessar vísur urðu til hjá henni þegar hún leit í spegil nýlega:
Andlitið er þvælt og þreytt
þrútið,skælt og bjagað.
Tímans hefur tönnin beitt
tuggið það og nagað.
Það er ekki sjón að sjá,
settar djúpum línum,
hendurnar sem hanga á
handleggjunum mínum.
Sigrún Ásta er Húnvetningur að ætt og uppruna, frá bænum Litladal í Austur-Húnavatnssýslu en hefur búið í Reykjavík frá 10 ára aldri. Í tómstundum sinnir hún einkum hestamennsku og svo vísna- og ljóðagerð.Hagyrðingarnir kvöldsins eru; Sigrún Haraldsdóttir, Jón Ingvar Jónsson og Friðrik Steingrímsson sem mætir alla leið úr Mývatnssveit. Stjórnandi kvöldsins er Unnur Halldórsdóttir fyrrum vert að Hótel Hamri í Borgarnesi.
Allir þeir sem hafa gaman af kveðskap eru hvattir til að mæta sem og allir þeir sem vilja láta reyna á hláturtaugarnar. Hagyrðingakvöldið er styrkt af Menningarráði Suðurnesja.
Aðgangseyrir 1.000 kr.