Samningur menntamálaráðuneytisins og Fisktækniskóla Íslands var lagður fram á fundi bæjarráðs. Bæjarráð fagnar því að komin er á samningur um stuðning ríkisins við verkefnið. Samningurinn er byggður á tímabundnum átaksforsendum og fjármagnaður af lið í fjárlögum vegna aðstæðna á vinnumarkaði. Bæjarráð tekur undir ályktun aðalfundar SSS um að nám í sjávarútvegi á Suðurnesjum sé til frambúðar og ætti að njóta virðingar sem slíkt.
Bæjarráð hvetur Alþingi og menntamálaráðherra til að veita Fisktækniskóla Íslands viðeigandi stöðu sem sérskóli á framhaldsskólastigi. Jafnframt að framlög til skólans verði eins og til annarra sambærilegra skóla á framhaldsskólastigi.
Bæjarráð hefur áhuga á að í Grindavík verði byggt upp framhaldsnám í samstarfi Fjölbrautaskóla Suðurnesja, Fisktækniskóla Íslands og Miðstöðvar símenntunar á Suðurnesjum.
Bæjarstjóra falið að óska eftir því við menntamálaráðherra að slíkt framhaldsnám verði í boði í Grindavík frá og með næsta skólaári.