Grindavík er einn mesti ferðamannabær landsins

• Fréttir
• 28. september 2011

Ferðaþjónusta er önnur af tveimur meginstoðum atvinnulífs í Grindavík. Sjávarútvegur er og verður meginstoðin, en störfum í ferðaþjónustu hefur fjölgað hratt og örugglega. Í Grindavík er vinsælasti ferðamannastaður landsins, Bláa lónið, sem tekur á móti um 450.000 gestum á ári og hefur um 200 manns í vinnu. Hér eru jafnframt veitingastaðir, kaffihús, hótel og gistiheimili og afþreyingarfyrirtæki sem skapa tugi starfa allt árið um kring. Fjöldi starfa í ferðaþjónustu í Grindavík eru því á fjórða hundrað og fer fjölgandi.

Ferðasumarið 2011 hefur verið afar gott og fyrirtæki í ferðaþjónustu upplifað mikla aukningu, bæði í fjölda gesta og í sölu sem lofar mjög góðu fyrir framtíðina. Veitinga-staðir hafa nefnt 15% aukningu milli ára, afþreyingarfyrirtæki yfir 30% og aukning á tjaldstæðinu er um 10%.

Möguleikar í ferðaþjónustu eru gríðarlega miklir og margt sem bendir til þess að gest-um muni halda áfram að fjölga enda Grindavík miðsvæðis og samgöngur um svæðið með besta móti. Góðir vegir, nálægð við alþjóðaflugvöllinn og hafnir í Reykjavík og Hafnarfirði sem taka á móti skemmtiferðaskipum skapa mikil tækifæri.

Á næsta ári bætist langþráð viðbót við samgöngukerfið þegar nýr Suðurstrandarvegur verður tekinn í notkun. Mikilvægt er að fyrirtæki í ferðaþjónustu og Grindavíkurbær byrji nú þegar að undirbúa sig þannig að gestir hafi ástæðu til að dvelja lengur. Ferðamenn eru á ferðinni allt í kringum bæinn en viðfangsefnið er tvíþætt. Annars vegar að finna segul sem dregur fólk inn í bæinn þegar heimsókn í Bláa lónið, á golfvöllinn eða skoðunarferð um aðrar náttúruperlur Grindavíkur stendur til og hins vegar að fjölga gestum utan háannatímans á sumrin. 

Hlutverk Grindavíkurbæjar er að veita aðstoð og skapa um-gjörð fyrir öflug ferðaþjónustufyrirtæki, svo sem með skipu- lagningu viðburða og bættum samgöngum. Ferða- og atvinnu-málanefnd hefur lagt til að gert verði átak við að leggja stíga milli bæjarins og Svartsengis, bæta merkingar og gera aðstöðu til að taka á móti gestum á hafnarsvæðinu. Stefnumörkun um Jarðvang (GeoPark), Kvikan, nýja tjaldstæðið, Menningarvikan og Sjóarinn síkáti eru líka dæmi um aðstoð og umgjörð bæjarins um ferðaþjónustu. Grindavíkurbær er reiðu-búinn að taka þátt fleiri í verkefnum sem stuðla að öflugri ferðaþjónustu, sérstaklega utan háannatímans. Frumkvæðið þarf að koma frá ferðaþjónustunni, en við erum reiðubúin til samstarfs því hagsmunirnir eru sameiginlegir.

Róbert Ragnarsson
bæjarstjóri

• Síðast uppfært: 28. september 2011