Bláa Lónið dagskrá á annan í páskum

• Fréttir
• 17. apríl 2006

Bláa Lónið á annan í páskum: Göngu- og fræðsluferð
Bláa Lónið og Leiðsögumenn Reykjaness s.e.s bjóða til göngu- og fræðsluferðar í hinu stórbrotna umhverfi Bláa Lónsins á annan í páskum.

Í boði er rúmlega eins og hálfs tíma gönguferð sem hefst kl. 13:00 við bílastæði Bláa Lónsins - og endar í Bláa Lóninu. Umhverfi Bláa Lónsins hefur upp á margt að bjóða og munu leiðsögumenn miðla sögum og fróðleik um svæðið. Gengið verður m.a. um mosagróið Illahraun, framhjá Rauðhól - gígnum, sem hraunið kom úr á sögulegum tíma - haldið austur með suðurhlíðum Þorbjarnarfells og inn á Baðsvelli. Þar er ætlunin m.a. að kíkja á þjófaslóðir og hin fornu sel Grindvíkinga. Þá verður gengið yfir að svæði Hitaveitu Suðurnesja og um hið litskrúðuga lónssvæði að Lækningalindinni.

Reynt verður að hafa ferðina og fræðsluna þannig að allir, jafnt börn sem fullorðnir, hafi gagn og gaman af. Góður skófatnaður æskilegur.
Allir á eigin ábyrgð.

Kl. 15.00 mun Birna Guðmundsdóttir, íþróttakennari, bjóða gestum heilsulindar upp á létta vatnsleikfimi og teygjur ofan í lóninu.

• Síðast uppfært: 17. apríl 2006