Matthías Grindvík kveður skólann eftir 30 ára starf

• Fréttir
• 25. ágúst 2011

Matthías Grindvík Guðmundsson umsjónarmaður Grunnskóla Grindavíkur til 30 ára hefur látið af störfum. Við skólasetningu í vikunni þakkaði Páll Leó Jónsson skólastjóri honum fyrir frábært starf í þágu skólans.

Páll Leó afhenti honum kveðjugjöf frá skólanum og sagði m.a. „Við sátum á starfsdögum fyrirlestur sem fjallaði um eitt og annað í samskiptum fólks og var einkum rætt um mikilvægi jákvæðs hugarfars og þakklætis til að bæta samskipti og líðan fólks - þetta kann Matti.

Einn af stóru kostum Matta er hversu vel honum gekk í samskiptum við nemendur og hafa margir þeirra leitað til hans í gegnum tíðina ekki síst í leit að hlýju og notalegu viðmóti.

Kæri vinur. Við þökkum þér frábært samstarf í Grunnskóla Grindavíkur. Þú hefur verið góður félagi, hlýr og umhyggjusamur bæði við börn og fullorðna. Nú gefst tími til sinna hinum mörgu hugðarefnum. Megir þú njóta sem best!"

• Síðast uppfært: 25. ágúst 2011