Kennsla hófst við Grunnskóla Grindavíkur í gær. Nokkrar breytingar hafa orðið á stjórnunarteymi skólans því Stefanía Ólafsdóttir lætur af störfum sem aðstoðarskólastjóri en hún mun áfram sinna ýmsum verkefnum fyrir skólann auk kennslu að hluta.
Stefanía hefur unnið við grunnskólann síðan haustið 1975, hún varð yfirkennari, sem síðar breyttist í aðstoðarskólastjóra frá 1987.
Pálmi Ingólfsson verður deildarstjóri 7. - 10. bekkjar og jafnframt gegnir hann starfi staðgengils sem þýðir að hann sinnir störfum skólastjóra í forföllum hans.
Ólöf Bolladóttir verður deildarstjóri 4.- 6. bekkjar auk námsvers. Ásrún verður deildarstjóri Hópsskóla og María Eir verður deildarstjóri sérkennslu.
Fram kom í setningarræðu Páls Leó Jónssonar skólastjóra að nemendur nú við upphaf skólastarfs eru 461 í 24 bekkjardeildum. 322 nemendur eru í Grunnskólanum og 139 nemendur í Hópsskóla. Kynjaskiptingin er sú að drengir eru heldur fjölmennari eða 247 en stúlkurnar eru 214.
Enginn nýr starfsmaður hefur verið ráðinn í tengslum við þetta skólaár og er það frekar óvanalegt. Hins vegar tekur nýr skólasálfræðingur, Ingibjörg María Guðmundsdóttir, til starfa svo og nýr skólahjúkrunarfræðingur, Dóra Dröfn Skúladóttir.