Nýtt fyrirtæki

• Fréttir
• 21. desember 2010

Fyrirtækið NetBerg.is tók til starfa í Grindavík fyrir skömmu en það er hluti af Opex ehf. NetBerg ehf. er vefverslun þar sem boðið er upp á fullkomin þjófavarnarkerfi og ýmis konar aukahluti á lager. Eigandi fyrirtækisins og starfsmaður er Bergur Haukdal sem aðallega hefur starfað í tölvugeiranum.

Síðan 2002 hefur Bergur unnið við kerfis- og netrekstur, fyrst hjá Hive og svo Vodafone. Árið 2008 tók hann þá ákvörðun að stofna sitt eigið fyrirtæki, Opex ehf, sem er í fyrirtækjaþjónustu og býður t.d. upp á alrekstur tölvakerfa, IP símkerfi, vefhönnun og ýmislegt annað.

-  Hvaða þjónustu og vörur er netberg.is að bjóða upp á?
,,NetBerg.is býður upp á fyrirtaks öryggiskerfi fyrir heimili og fyrirtæki sem vilja verja sig gegn innbrotum sem hefur fjölgað mikið undanfarið.

Kerfin okkar eru næstum því alveg þráðlaus, bara þarf að tengja rafmagn og síma í stjórnstöðina. Þau virka þannig að þú stillir inn þau símanúmer sem þú vilt að kerfið hringir í þegar það þarf að senda út boð, hægt er að stilla inn allt að 4 símanúmer og tilvalið að hafa heimilisfólk og svo kannski nágranna inni.
Við bendum fólki á að virkja nágrannavörsluna með kerfunum okkar, gott er að gera samkomulag við nágranna í 2-3 húsum í götunni og fá að hringja í þá ef þú færð boð á meðan þú ert að heiman. Það að koma upp góðri nágrannavörslu styttir viðbragðstíma svo munar!

Í Grindavík þurfa öryggisverðir frá stóru öryggisfélögunum að koma langt að og getur það tekið sinn tíma.
Við bendum fólki á rafverktaka á svæðinu sem setur upp kerfin. Yfirleitt tekur uppsetning 2-3 tíma," segir Bergur. Munurinn á þessu og stóru öryggisfyrirtækjunum er fyrst og fremst sá að viðkomandi á öryggiskerfið og borgar engin mánaðargjöld fyrir vöktun á því heldur vaktar það sjálfur með fjölskyldumeðlimum og nágrönnum.

,,Mánaðargjöld til stóru félagana eru á bilinu 5.000 til 8.000 kr á mánuði, svo ef þú reiknar þetta út þá ertu fljótur að borga niður kerfin okkar," segir Bergur.

- En hver er framtíðarsýn fyrirtæksins?
,,Ég ætla mér að auka vöruúrvalið jafnt og þétt ef við fáum góðar móttökur, sem mér sýnist nú bara vera komið á hreint. Ég er ekki ennþá búinn að auglýsa neitt en er samt búinn að selja nokkur kerfi," sagði Bergur að endingu.

Nánari upplýsingar um vörur og fyrirtækið er að finna inn á www.netberg.is

• Síðast uppfært: 21. desember 2010