Í gærkvöld var haldið í Saltfisksetrinu sagnakvöld sem hluti af verkefninu Baðstofuvikur á Suðurnesjum. Kvöldið hófst á því að Ellert Grétarsson ljósmyndari leiddi gesti um stórbrotna náttúru Krýsuvíkur með glæsilegri myndasýningu en Ellert hefur tekið fjölda mynda af þessu svæði og er tilbúinn með efni í heila ljósmyndabók.
Á eftir honum fjallaði Ómar Smári Ármannsson um sögu brennisteinsvinnslu og byggðar í Krýsuvík og var það erindi afar áhugavert og fræðandi. Talið er að á árunum 1724 - 1729 hafi tveir Þjóðverjar, Holzman og Sechmann, byrjað að taka brennistein úr „Krisuvík". Þegar Innréttingar Skúla Magnússonar voru stofnaðar um miðja átjándu öld var komið upp húsi í Krýsuvík til að vinna brennistein á Íslandi og er síðan talið er að brennisteinsvinnsla hafi svo verið unnin í Krýsuvík, með hléum þó, allt til ársins 1885.
Í lokin gerði Óskar Sævarsson grein fyrir uppbyggingu þjónustumiðstöðvar í Seltúni og þeim framkvæmdum sem fyrirhugaðar eru á því svæði á næsta ári.
Um 40 manns voru mætt á sagnakvöldið. Verkefnið Baðstofuvikur er styrkt af Menningarráði Suðurnesja.
Efsta mynd: Sagnameistarar gærkvöldsins, Ómar Smári, Ellert og Óskar.
Ein af myndum Ellerts.
Ný þjónustumiðstöð í Seltúni.
Gömul mynd úr Krýsuvík.