Ferðamálafélag Grindavíkur hefur gefið út rit um Húshólma - merkilegur staður í umdæmi Grindavíkur. Í því er m.a. fjallað um sögu hólmans, minjarnar, sem í honum eru, tengsl við nálæga minjastaði, aldur minjanna og Ögmundarhrauns er umlykja þær, aðkomur, hugleiðingar um fólkið, verndun og nýtingu svæðisins til framtíðar.
Rústa í Húshólma, Gömlu Krýsuvík, hefur verið getið í heimildum frá því um 1607. Þær eru taldar vera frá því fyrir 900 og jafnvel frá upphafi landnáms hér á landi. Litlar rannsóknir hafa verið gerðar á svæðinu, en í ritinu eru þær m.a. raktar.
Ritið verður til sölu í Saltfisksetri Íslands í Grindavík.Ferðamálafélag Grindavíkur hefur áður gefið út rit um Selatanga í sama ritflokki. Það er nú að verða uppselt, enda fengið mjög góðar viðtökur. Stefnt er að því að gefa auk þess út rit um það sem merkilegt getur talist í Þórkötlustaðahverfi, Járngerðarstaðahverfi og Staðarhverfi með tilheyrandi uppdráttum og lýsingum.
Ritin eru einkum ætluð ferðafólki og áhugasömu fólki um hina merku sögu, duldu minjar og stórbrotnu náttúru í umhverfi Grindavíkur. Upplýsingarnar glæða gömul svæði nýju lífi.