Skondið atvik átti sér stað í leik Grindavíkur og ÍR í kvöld. Annar Bandaríkjamaðurinn í liði Grindavíkur, Ryan Pettinella, tróð svo kröftuglega í körfuna um miðja þriðja leikhluta að önnur keðjan sem hélt körfunni uppi slitnaði. Gera þurfti 10 mínútna hlé á leiknum á meðan gert var við körfuna.
Snorri Kristinsson, starfsmaður íþróttahússins, var fljótur til að lagfæra körfuna og gerði það á mettíma og var honum klappað lof í lófa. Leikurinn gat því haldið áfram öllum til mikillar gleði.