Karla- og kvennalið Grindavíkur áttu ólíku gengi að fagna í Lengjubikarnum í körfubolta um helgina. Grindavík burstaði Njarðvík með 102 stigum gegn 87 í Lengjubikar karla í gærkvöldi. Páll Axel Vilbergsson skoraði 28 stig fyrir Grindavík og Ólafur Ólafsson skoraði 16 og hirti 11 fráköst.
Með sigrinum komst Grindavík í undanúrslit þar sem þeir mæta Íslands- og bikarmeisturum Snæfells 22. september.
Haukar unnu Grindavík í baráttuleik 64-49 í Lengjubikar kvenna. Hjá Grindavík skoraði Helga Hallgrímsdóttir 17 stig og tók 19 fráköst. Næst á eftir Helgu kom Berglind Anna Magnúsdóttir með 11 stig. Grindavíkurstelpur eru þar með úr leik.