Á dögunum fór starfsfólk bæjarskrifstofunnar í heimsókn til varnarliðsins á Keflavíkurflugvelli. Flugher bandaríkjahers bauð Ólafi Erni Ólafssyni og starfsfólki hans í formlega heimsókn sem byrjaði með móttöku í aðalstöðvum flughersins þar sem Col. Phil Gibbons tók á móti gestunum og útskýrði starfsemi flughersins á Keflavíkurflugvelli. Við það tækifæri var Ólafur gerður að ?Honorary 85th Group Commander?.  Að því loknu var  boðið upp á  léttan hádegisverð í matsal flughersins. Þessu næst varð hópurinn vitni að flugtaki þriggja  F-15 orrustuflugvéla  í návígi með miklum tilþrifum en eftir flugtak fóru vélarnar þráðbeint upp í loftið. Eftir það fékk hópurinn að skoða eina F-15 vélina og setjast í flugstjórnarsæti þar sem leiðsögutæki og tól voru skoðuð. Þá var haldið til þyrlusveitarinnar í hið geysistóra skýli Jolly Green sveitarinnar en svo nefnist þyrlusveitin innan varnarstöðvarinnar. Þyrlusveitin er sérþjálfuð í björgunarstörfum og hefur undanfarinn 30 ár bjargað hundruðum mannslífa á Íslandi. Áhöfn einnar þyrlunnar tók á móti hópnum og hafði lagt allan búnað þyrlunnar á gólfið í kringum vélina og tók hver áhafnarmeðlimur að útskýra sitt hlutverk og þann búnað sem þeir unnu með. Gestir nýttu sér óspart boð um að setjast í flugmannssæti þyrlunnar. Í vel skipulagðri dagskrá var þessu næst haldið í ratsjárbygginguna og fengu gestir að ganga í gegnum stjórnsal og var  engu líkara en maður væri staddur í bíómynd og framundan væri geimskot. Hér fylgist flugherinn með öllum flugvélum sem koma inn í íslenska flugstjórnarsvæðið og passa upp á að engar óviðkomandi vélar nálgist landið. Eftir heimókn í ratsjárstöðina var haldið í heimsókn til  öryggisveita flughersins. Þar voru skoðuð þau vopn sem öryggisveitirnar  bera. Að lokum kom hópurinn saman í aðalstöðvum flughersins þar sem saman voru komnir næstráðendur hverrar deildar fyrir sig og gáfu yfirmanni sínum skýrslu um starfsemi dagsins. Að loknu kaffispjalli skiptust hóparnir á gjöfum. Heimsóknin var einkar skemmtileg og vel skipulögð og kom velflestum mjög á óvart bæði hvað varðar umfang varnarliðsins og ekki síst það gífurlega fjármagn sem þarf til að halda stöðinni uppi, t.d. kostar flugmannshjálmur F-15  um 6. milljónir króna, ein flugferð F-15 kostar um 8-9 milljónir o.s.f.rv. Sjá myndasafn á heimasíðu grindavik.is