Helga Bryndís Magnúsdóttir hefur verið ráðin organisti við Grindavíkurkirkju. Helga Bryndís er starfandi organisti og kórstjóri við Möðruvallakirkju í Hörgárdal og við kirkjurnar þar í kring og einnig í kirkjunum í Svarfaðardal og er stjórnandi Samkórs Svarfdæla. Hún starfar einnig við Tónlistarskólann á Akureyri og Tónlistarskóla Dalvíkurbyggðar.
Helga Bryndís hefur lokið Kirkjuorganistaprófi frá Tónskóla Þjóðkirkjunnar en hennar aðalmenntun og starf hefur verið píanóleikur. Hún stefnir á að klára Kantorspróf við Tónskóla Þjóðkirkjunnar á næstu misserum. Helga Bryndís kemur til starfa í Grindavíkurkirkju 1. janúar 2011 og bjóðum við hana hjartanlega velkomna.
Þess má geta geta að Helga Bryndís er fædd og uppalin í Vestmannaeyjum og er systir Páls Magnússonar útvarpsstjóra.