Metaðsókn var á Sjóaranum síkáta í gær sem fram fór í blíðskapar veðri. Tjaldstæðið í Grindavík var fullt og gott betur, fólk streymdi í bæinn fram eftir degi til þess að taka þátt í hátíðarhöldunum. Allir fundu eitthvað við sitt hæfi enda dagskráin fjölbreytt og skemmtileg. Allt gekk vel fyrir sig bæði til sjós og lands en í höfninni var að vanda ýmislegt um að vera eins og róðrakeppni og fleira.
Á hátíðarsviðinu voru mörg skemmtileg atriði þar sem m.a. Friðrik Ómar og Jogvan og Skoppa og skrítla drógu að þúsundir gesta. Keppnin um Sterkasta mann á Íslandi setti skemmtilegan svip á dagskrána og þá vann græna hverfið kraftakeppnina sem og róðrakeppni hverfanna. Keppt var í netabætingum, slökkviliðið bauð upp á reykköfun, á annað hundrað mótorhjól komu í bæinn og settu svip á hátíðarsvæðið, leiktækin voru afar vinsæl, Brúðubíllinn var á sínum stað, hestateyming var vinsæl, fjólhjól og gó kart sömuleiðis, þá voru fótboltamót og sundmót og svona mætti telja endalaust upp.
Myndirnar tala sínu máli en fleiri myndir og myndband verður sett inn á síðuna.