Áttrćđ međ geisladisk - Tekur á móti gestum í Salthúsinu kl. 14

  • Fréttir
  • 23. maí 2010
Áttrćđ međ geisladisk - Tekur á móti gestum í Salthúsinu kl. 14

,,Tónlistin hefur gengið eins og rauður þráður í gegnum allt mitt líf," segir Margrét Sighvatsdóttir úr Grindavík við Morgunblaðið en hún heldur upp á áttatíu ára afmæli sitt í dag hvítasunnudag og tekur á móti gestum í Salthúsinu kl. 14:00 og eru allir velkomnir. 

 Af því tilefni hafa börn hennar látið útsetja og taka upp nokkur lög hennar á geisladisk sem valdir hljóðfæraleikarar flytja. Lögin hennar mömmu heitir diskurinn og kemur út á afmælisdaginn. Öll börn Margrétar syngja á disknum og tvær dótturdætur hennar.

,,Lögin hafa orðið til við ýmis tilefni og stundum nánast óvænt," segir Margrét. Lagið Söngur sjómannskonunnar, sem hún söng inn á plötu með Gylfa Ægissyni fyrir allmörgum árum, samdi hún árið 1965 þegar Páll H. Pálsson eiginmaður hennar var á síld norður á Siglufirði. Lagið Tunglskinsnóttin samdi hún á göngu síðla nætur þegar hún var að bera út Morgunblaðið en hún var umboðsmaður þess í Grindavík í nokkur ár. Svona mætti áfram telja þegar saga einstakra laga er rakin.

Margrét og eiginmaður hennar eignuðust sex börn. Þegar að félagslífi þeirra kom lét hún ekki sitt eftir liggja, samdi barnaleikrit, lög og texta, málaði leiktjöld, hannaði búninga og annað sem þurfti við slíka uppfærslu.

,,Textarnir úr þessum barnaleikritum lýsa mömmu afskaplega vel, en hún er einstaklega jákvæð manneskja og hefur alltaf séð hið jákvæða og góða við allt í lífinu. Þá söng hún í kirkjukór Grindavíkur í rúm þrjátíu ár og tók virkan þátt í tónlistarlífinu í kirkjunni auk þess að leika á gítar og harmoniku við ýmis tækifæri," segir Sólný dóttir hennar.  

Í dag búa Margrét og eiginmaður hennar í þjónustuíbúð við Hrafnistu í Hafnarfirði. Og þar - eins og annars staðar - er Margrét á fullu í tónlistinni. Hún syngur í Gaflara-kórnum sem svo er nefndur og er í hljómsveit sem kallar sig DAS-bandið sem spilar einu sinni í viku fyrir dansi á Hrafnistu.

Mynd: Morgunblaðið

Deildu ţessari frétt