Sendiherrar Norðurlandanna á Íslandi ásamt færeyska konsúlnum heimsóttu Grindavík í morgun. Tilgangur heimsóknarinnar var að kynna sér íslenskan sjávarútveg. Sendiherrarnir komu við í Saltfisksetrinu, fengu sér að borða fisk í Salthúsinu og heimsóttu svo Vísi.
Ólafur Örn Ólafsson bæjarstjóri tók á móti sendiherrunum, mökum og starfsmönnum sendiráðanna ásamt færeyska konsúlnum í Saltfisksetrinu. Þetta voru þau Sören Haslund sendiherra Danmerkur, Hannu Hämäläinen sendiherra Finnlands, Anders Ljunggren sendiherra Svíþjóðar, Margit Tveiten sendiherra Noregs og Gunvør Balle konsúll Færeyja ásamt fylgdarliði.
Hópurinn hóf daginn á því að kynna sér starfsemi HB Granda í Reykjavík en hélt svo til Grindavíkur. Ólafur Örn fór yfir stöðu Grindavíkur og mikilvæg bæjarfélagsins í íslensku sjávarútvegi í gegnum tíðina. Sterk staða bæjarins í þeim efnum vakti athygli gestanna sem spurðu margs. Sendiherrarnir ásamt fylgdarliði fóru svo í skoðunarferð um Saltfisksetrið. Þeir voru svo kvaddir með gjöfum og síðan var haldið á Salthúsið að borða og þa tók við skoðunarferð um Vísi sem sendiherrunum fannst afar áhugaverð. Heimsókn tókst í alla staði vel og nokkuð ljóst að fulltrúar Norðurlandaþjóðanna á Íslandi eru margs vísari um undirstöðu atvinnugreinina hér á landi eftir þessa heimsókn.