Árshátíðsýning grunnskólans fer fram þriðjudaginn 16. mars kl. 15.30. Dansleikur er um kvöldið fyrir nemendur í 5. - 10.bekk með Ingó og Veðurguðunum. Óskað er eftir að foreldrar sæki börn sín að honum loknum. Bæjarsýning er í skólanum miðvikudaginn 17.mars kl. 20.00. Önnur bæjarsýning fer fram í skólanum sunnudaginn 21.mars kl. 15.00. Nemendur í 10.bekk bjóða upp á vöfflur og drykki á bæjarsýningunum gegn vægu verði. Einnig verður til sölu skólablaðið sem nemendur í 10.bekk hafa unnið að upp á síðkastið. Ágóði allrar sölu rennur í ferðasjóð nemenda.
Leikritið heitir Dúkkulísa og er eftir Þórdísi Elvu Þorvaldsdóttur leikkonu, leikskáld og rithöfund. Sambýlismaður hennar er Grindvíkingurinn Víðir Guðmundsson leikari en hann leikstýrir verkinu og er reyndar í því hlutverki annað árið í röð. Frumsýning leikritsins er hluti af menningarviku í Grindavík.
Verkið fjallar um Lísu sem er 15 ára og nýbúin að eignast barn. Leikritið gerist á einni kvöldstund og hefst heima hjá Lísu. Sæunn vinkona hennar sem er flutt úr bænum er í heimsókn og á leiðinni á ball í skólanum. Skyndilega er bankað á gluggann og þar birtist barnsfaðir Lísu sem hefur ekki séð hann frá því hún var ófrísk. Með honum er Diddi og eru þeir á leiðinni á ballið líka og undarleg stemmning myndast við þessar aðstæður. Diddi tekur upp bjór og eitt leiðir af öðru. Áður en langt er um liðið heldur Lísa af stað á ballið með barnið með sitt með sér. Hvað gerist við þessar aðstæður er ómögulegt að segja og verður ekki upplýst hér. Sjón er sögu ríkari.