Óvænt músaheimsókn á Laut - Músin vildi bara ost!

• Fréttir
• 15. janúar 2010

Krakkarnir á leikskólanum Laut lentu í músaævintýri þegar þau voru að leika sér á útisvæðinu í vikunni. Þau komu auga á litla hagamús og Sara Arnbjörnsdóttir, leiðbeinandi á Hlíð, brást fljótt við og með aðstoð fangaði hún músina í plastbox. Var músin boðin velkomin í Laut og eins og góðum gestgjöfum sæmir var henni boðið upp á veitingar.

Börnin gáfu henni ost en einnig vildu þau bjóða upp á súkkulaðikex. Músin skellti sér beint í ostinn en vildi ekki sjá súkkulaðikexið enda er osturinn miklu hollari en kexið! Vakti músin að vonum mikla athygli á meðal barnanna. Eftir hádegi ákváðu börnin að nú ætti að sleppa henni úr boxinu og var haldið af stað út í móann á bak við leikskólann. Þar var músinni sleppt með fallegum kveðjuorðum líkt og: ,,Farðu nú og finndu mömmu þína", ,,Nú skaltu eiga mörg börn", ,,Gangi þér vel" o.s.frv.

Fleiri myndir á heimasíðu Lautar: http://leikdal.simnet.is/Myndir%20-Hl%C3%AD%C3%B0/jan/13.jan%20m%C3%BAsaheims%C3%B3kn/ 

• Síðast uppfært: 15. janúar 2010