Í Morgunblaðinu í dag er körfuknattleikslið Grindavíkur kynnt. Þar segir m.a.: ,,Vorið 1996 fagnaði Grindavík Íslandsmeistaratitlinum í körfubolta karla eftir úrslitaeinvígi við grannaliðið úr Keflavík. Grindavík rauf þar einokun Keflavíkur og Njarðvíkur sem höfðu skipst á um að landa þessum titli frá árinu 1991. Grindavík hefur ekki náð að endurtaka leikinn frá vorinu 1996 þrátt fyrir að liðið hafi verið vel skipað og komið sér í færi til að ná alla leið.
S.l. vor fékk Grindavík gullið tækifæri til þess að landa Íslandsmeistaratitlinum í oddaleik gegn KR í DHL-höllinni. KR sigraði 84:83 í þeim leik en Grindvíkingar voru með boltann í síðustu sókn leiksins og höfðu tækifæri til þess að skora. En sóknin rann út í sandinn án þess að liðið næði að skjóta á körfuna. Eflaust hafa leikmenn, þjálfarinn og stjórnarmenn verið að ergja sig á þeirri staðreynd eitthvað fram eftir sumri.
Grindvíkingar verða án efa í baráttunni um alla þá titla sem eru í boði í íslenskum körfubolta í vetur."
Jafnframt er viðtal í Morgunblaðinu við Friðrik Ragnarsson, þjálfara Grindavíkur. Þar segir í fyrirsögn að Grindavík glími við óvenjulegt vandamál því sóknarleikurinn sé veikleiki liðsins þessa dagana!