Heilt fótboltalið er lagst í bælið eftir að flensa stakk sér niður í meistaraflokki karla Grindavíkur í knattspyrnu í vikunni. Þeir fyrstu lögðust á mánudaginn og þrír í gær en alls eru tíu leikmenn með flensueinkenni en það skýrist á morgun hvers eðlis hún er. Staðfest er að einn leikmaður er með svínaflensu.
Nánast allt byrjunarlið Grindavíkur frá því í leiknum gegn Þrótti síðasta sunnudag er með flensu. Nokkrir eru enn rúmliggjandi en 2-3 eru farnir að hressast en hætta á fleiri eigi eftir að veikjast.
Grindavík mætir ÍBV á Grindavíkurvelli á sunnudaginn og hefur Grindavík beðið um að þeim leik verði frestað.