Skógræktarfélagið vill planta trjám í trefil utan um Þorbjörn

• Fréttir
• 29. júní 2009

Margir hafa velt því fyrir sér hvenær Skógræktarfélag Grindavíkur var stofnað. Í samantekt Margrétar Kristjánsdóttur, ritara félagsins, kemur fram að það var stofnað 1957 af Ingibjörgu Jónsdóttur kvenfélagskonu sem plantaði þá strax fyrstu plöntunum í Selskógi sem er vísir að þeim skógi sem við þekkjum í dag.

Félagið lagðist í dvala árið 1988 en það var svo vaskur hópur skógræktaráhugafólks sem tók sig til og endurvakti félagið 2006. Félagsmenn eru nú rúmlega 40 og þeirra bíður mikið og skemmtilegt verk. Frá því 2006 hafa verið gróðursettar um 6000 plöntur.

Markmið Skógræktarfélags Grindavíkur eru mörg, m.a. að bæta aðkomuna að Selskógi sem er ekki góð eins og hún er í dag, gera göngustíga, grisja og gera skóginn að betra útivistarsvæði Grindvíkinga. Vonast félagið til þess að Grindavíkurbær og fyrirtæki í bænum komi þeim til hjálpar í þeim efnum.

,,Von félagsins er að fá að planta trjám í trefil utan um Þorbjörn og láta gera góða gönguleið þar í kring og til bæjarins. Vonandi fjölgar þeim sem vilja starfa eða styrkja Skógræktarfélag Grindavíkur því öll viljum við eiga þátt í uppgræðslu skemmtilegra útivistarsvæða fyrir Grindvíkinga í framtíðinni. Árgjaldið er 2000 krónur og eru allir velkomnir til starfa eða styrktar," segir í yfirliti Margrétar.

Stjórn félagsins skipa:
Jóhannes Vilbergsson formaður S.860-8448 E-mail Margretogjoi@hive.is
Helgi Einarsson gjaldkeri
Margrét Kristjánsdóttir ritari
Sveinn Árnason meðstjórnandi
Viktoría Róbertsdóttir meðstjórnandi

• Síðast uppfært: 29. júní 2009