"Þetta er mjög undarlegt. Við erum nýbúnir að kaupa jarðir og síðan kemur ríkið og segist eiga þær," segir Júlíus. " Ég skil þetta ekki alveg og held í raun að þetta geti ekki verið annað en mistök hjá ríkinu. Það má mikið vera ef þetta er allt í einu orðið einskismannsland."

Júlíus segir að lögmaður hitaveitunnar muni fara gaumgæfilega yfir málið á næstunni.

"Það er alveg ljóst að við munum ekki una þessari kröfugerð. Við látum ekki taka af okkur landssvæði sem við erum nýbúnir að kaupa og þinglýsa hjá ríkinu," segir Júlíus.

Baldur Guðlaugsson, ráðuneytisstjóri fjármálaráðuneytisins, segir kröfugerð ríkisins fyrst og fremst snúast um það hvar mörk eignarlanda og þjóðlendna séu. Það sé síðan óbyggðanefndar eða dómstóla, ef málum sé skotið þangað, að skera úr um málin. Baldur segir gagnrýni á hendur ríkinu meðal annars byggja á misskilningi. Þó ríkið hafi til að mynda skrifað upp á samninga milli orkufyrirtækja og einstaklinga um að nýta ekki forkaupsrétt sinn á ákveðnu landsvæði hafi það ekki afsalað sér rétt sínum til að kanna nákvæmlega landamörk eignarlandanna.

Hjörleifur segir að ríkið sé meðal annars að gera kröfu í hluta af landi sem Orkuveitan hafi nýlega keypt af ríkinu sjálfu og einstaklingum á hundruð milljóna. Baldur segist ekki vita betur en að í samningi ríkisins við Orkuveituna hafi verið gerður fyrirvari um mörk landsins með tilliti til afréttar eða þjóðlendna.

• Síðast uppfært: 25. febrúar 2004