Línubeitningarbáturinn Geirfugl GK 66 gerir það gott á lúðuveiðum 100 mílur vestur af landinu. Geirfugl GK 66 kom til Grindavíkurhafnar í nótt með fullan bát af lúðu eða um 3 tonn. Þetta var þriðji lúðutúrinn og að þessu sinni var stærsta lúðan heil 130 kg borið saman við 110 kg í síðasta túr.
Að sögn Jóns Gauta Dagbjartssonar stýrimanns, er lítið mál að eiga við svona risa lúður því þær eru rólegar og virðast saddar lífdaga, eins og hann komst að orði, enda líklega orðnar 30 ára gamlar. Þær minni og yngri séu mun sprækari.
,,Svo er auðvitað lítið mál fyrir svona Manchester United jaxla eins og okkur að eiga við svona skrímsli. Ef það væru bara Liverpoolmenn um borð væru þeir að fá helmingi minni lúður en segðu söguna eins og um risa lúður væri að ræða, eins og þessa hérna," sagði Jón Gauti og klappaði lúðunni vinalega.
Geirfugl GK 66 heldur aftur á lúðumiðin á sunnudaginn.
Á myndinni eru Haukur Einarsson skipstjóri, Jón Ásgeir Halldórsson háseti og Jón Gauti Dagbjartsson stýrimaður, við löndun á risa lúðunni í morgun.