Hefur þú áhuga á því að gefa blóð? Blóðbankabíllinn verður í Grindavík við Rauða kross húsið, miðvikudaginn 1. apríl frá kl. 10 - 17. Allir velkomnir. Blóðgjöf er lífgjöf. Eitt mikilvægasta hlutverk Blóðbankans er að tryggja öryggi blóðgjafa og blóðþega með faglegum vinnubrögðum.
Blóðbankinn tekur mið af alþjóðlegum kröfum í daglegu starfi sínu og fékk árið 2000 alþjóðlega gæðavottun, fyrstur allra blóðbanka á Norðurlöndum. Stofnfrumuvinnslan fékk einnig alþjóðlega vottun sinnar starfsemi árið 2006.
Blóðbankinn var stofnaður árið 1953 og sér um blóðsöfnun, blóðhlutavinnslu, birgðahald og afgreiðslu blóðhluta á landsvísu. Helsta viðfangsefni bankans er að svara þörfum sjúkrastofnana fyrir blóðhluta og sinna blóðrannsóknum vegna þessara starfsemi.
Nútíma heilbrigðisþjónusta er óhugsandi án öflugrar blóðbankaþjónustu. Blóð er notað til að bæta sjúklingum upp blóðmissi, til dæmis vegna slysa eða skurðaðgerða. Þá er blóð meðal annars einnig notað við meðferð krabbameinssjúklinga sem og nýbura og fyrirbura.
Blóðbankanum hefur alltaf gengið vel að fullnægja eftirspurn eftir blóðhlutum, þökk sé blóðgjöfunum. En þörfin er að aukast. Með aukinni tækni og þekkingu aukast meðferðarúrræði, auk þess sem þróunin á Vesturlöndum er sú að öldruðum fjölgar. Því fjölgar þeim sem þurfa blóð og á sama tíma fækkar þeim hlutfallslega sem geta gefið blóð. Því er nauðsynlegt að blóðgjöfum fjölgi, sérstaklega meðal ungs fólks.