Menningarviku Grindavíkurbæjar lauk með bráðskemmtilegum tónleikum í Grindavíkurkirkju á laugardaginn þar sem menningarvikunni var svo formlega slitið. Trompetleikarinn Íris Kramer og harmonikuleikarinn Hrólfur Vagnsson frá Bolungarvík spiluðu í þessu litríka prógrammi lög og verk
eftir Piazzolla, Gillespie, Chick Corea, Nordheim sem og eigin lög og spuna. Tónleikarnir voru frábærir enda listafólk á heimsmælikvarða.
Í lok tónleikanna sleit Kristinn Reimarsson, frístunda- og menningarfulltrúi, menningarviku Grindavíkur með formlegum hætti. Óhætt er að segja að vel hafi tekist til en þetta er í fyrsta skipti sem slík menningarvika er haldin í Grindavík. Vel tókst að virkja listafólk í bænum og dagskráin var svo krydduð með utanbæjar listafólki. Aðsókn á flesta viðburði var framar vonum og gaman að sjá hversu Grindavíkingar voru öflugir að mæta. Stefnt er að því að menningarvika Grindavíkur verði árlegur viðburður.