Á lokadegi menningarviku í Grindavík mættu rithöfundarnir Guðbergur Bergsson og Einar Már Guðmundsson en þeir voru hér á vegum Bókasafns Grindavíkur. Guðbergur er heiðursborgari Grindavíkurbæjar og einn af okkar virtustu rithöfundum og því mikill hvalreki að fá hann á heimaslóð ásamt Einar Má. Kvennó var þétt setið þegar þessir miklu snillingur mættu.
Guðbergur tók til máls og sagðist hafa leikið í tveimur leikritum sem sett voru upp í Kvennó á sínum tíma. Þá las hann upp úr einu verki sínu. En síðan tók Einar Már við og fjallaði um Guðberg og áhrif hans á íslenskar bókmenntir og ekki síst á sjálfan sig. Einar Már fór á kostum og verður þessi stund með rithöfundunum lengi í minnum höfð.
Ungt og efnilegt tónlistarfólk frá Grindavík lék á píanó og þverflautur á milli atriða sem setti skemmtilegan svip á dagskrána.
Að neðan: Guðbergur og frænka hans, Guðrún Guðsteinsdóttir
Að ofan: Feðginin Hinrik Bergsson og Jóhanna Hinriksdóttir.
Að neðan: Ungar og efnilegar tónlistarstúlkur sem léku á milli atriði: Stefanía Margeirsdóttir á píanó, Valgerður María Þorsteinsdóttir á píanó, Telma Sif Reynisdóttir á þverflautu og Herta Pálmadóttir á þverflautu.