Á morgun, föstudaginn 16. október verður haldinn árlegur bleikur dagur. Á Bleika deginum eru landsmenn hvattir til að bera slaufuna, klæðast bleiku og lýsa skammdegið upp í bleikum ljóma. Er þetta gert svo allar konur sem greinst hafa með krabbamein finni stuðning og samstöðu.
Nokkrar stofnanir bæjarins hafa auglýst bleika daginn á morgun, t.d. bókasafnið, Leikskólinn Laut og Grunnskólinn. Þá nefnir vefur Bleiku slaufunnar sérstaklega Hérastubb bakara í Grindavík í upptalingu sinni á þeim vinnustöðum sem hafa verið duglegir að smella einhverju góðgæti í ofnainn og skreyta í tilefni dagsins. Sé tíminn naumur megi líka leita til þeirra fjölmörgu fyrirtækja sem leggja Bleiku slaufunni lið með bleiku góðgæti - hér eru nokkur dæmi.
Heimasíðan myndi gjarnan vilja fá sendar myndir af bleika deginum á morgun sem birtar verða um helgina á vefsíðunni. Hægt er að senda myndir á heimasidan@grindavik.is