Grindvíkingurinn Sigurbjörg Vignisdóttir gerði sér lítið fyrir og landaði Íslandsmeistaratitli í hjólreiðum um síðustu helgi. Sigurbjörg var að keppa í svokallaðri Criterium keppni í B-flokki kvenna, sem eru stuttar hjólreiðakeppnir, annálaðar fyrir mikinn hraða og mikla spennu. Hjólaður er 1.9 km langur hringur. Criterium fer þannig fram, að hjólað er í hringi, ef keppandi er hringaður lýkur hann keppni og hjólar að rásmarki. Þessi glæsilegi árangur Sigurbjargar er eftirtektarverður þar sem hún hefur ekki verið lengi í hjólreiðum.
"Ég byrjaði að hjóla sumarið 2019. Það var í kjölfar þess að ég velti fyrir mér afhverju mér leið svona vel þegar ég bjó í Kaupmannahöfn. Þá áttaði ég mig á því að það var hjólið, útiveran og hreyfinginn sem gerði svo mikið fyrir andlegu heilsuna og átti svo mikið við mig."
Í kjölfarið keypti Sigurbjörg sér svo hjól í júní 2019. Mánuði síðar var hún búin að selja það og komin á alvöru götuhjól eða svokallaðan racer. "Ég keppti fyrsta skiptið í Kía gullhringnum í ágúst í fyrra. Átti að hjóla 48 km en gleymdi að beygja og fór 67 km og lenti í 2 sæti í því móti! Svo tók ég aftur þátt í því móti í ár og var í 4 sæti.
Sigurbjörg segist ekki hafa verið mikið að spá í vinna titil þegar hún tók þátt í keppninni um síðustu helgi. "Markmiðið mitt var bara að klára og vera ekki hringuð. Ég ætla að keppa svo í bikarmóti næstu helgi sem verður haldi í hér í Grindavík og heitir Samskiptamótið. En á næsta ári mun ég taka þátt í fleiri mótum en ég er byjuð í einkaþjálfun hjá konu sem er góð í að þjálfa hjólreiðafólk."
Við óskum Sigurbjörgu innilega til hamingju með titilinn!