Nokkuð hefur borið á því að hundaeigendur í Grindavík séu ekki að fara eftir samþykktum um hundahald á Suðurnesjum. Því miður eru einhverjir hundaeigendur með hunda lausa innanbæjar og á útivistarsvæðum bæjarins, t.d. niðri í Bót og við Þorbjörn.
Því miður hefur það gerst, að hundar ráðist á gangandi vegfarendur og aðra hunda sem þá eru í taumi.
Umhverfis- og ferðamálanefnd bæjarins hefur fjallað um þessi mál á fundum sínum eftir ábendingar íbúa og óskað eftir að merkingar verði settar upp á þeim svæðum þar sem hundaeigendur eru að losa hunda sína úr taumi. Samkvæmt samþykktum um hundahald á svæðinu er lausaganga hunda bönnuð á almannafæri.
Í vinnslu er hjá bæjaryfirvöldum að setja upp hundagerð í Grindavík þar sem hægt er að fara með hunda og taka úr taumi. Þar til það kemst í notkun eru hundaeigendur beðnir um að virða þær reglur um hundahald sem í gildi eru.
Þeim tilmælum er hér með beint til hundaeigenda að hafa hunda sína í taumi og hreinsa einnig upp eftir þá á almannafæri. Þvi verður augljóslega ekki komið við ef hundurinn gengur laus án eiganda síns.