Nýr liður hefur nú gengið í garð á heimasíðunni þar sem að við ætlum að vera dugleg að heimsækja matsölustaði í Grindavík í sumar. Gúrmé í Grindavík er umfjöllunarliður matseldar í bænum og hvetjum við alla bæjarbúa til þess að kynna sér alla þá fjölbreyttu staði sem Grindavík hefur upp á að bjóða. Staðurinn að þessu sinni sem við kynnum er bakarí okkar Grindavíkinga, Hérastubbur. Við hittum Hrafnhildi og spurðum hana nokkra spurninga.
Veisluþjónustan orðin gríðarlega vinsæl
Hérastubbur er bakarí og konditori sem var stofnað árið 1995 af Sigurði Enokssyni og Enoki Bjarna Guðmundssyni og opnaði það 6.júlí árið 1995. Bakaríið býður upp á fjölbreytt úrval af brauði, rúnstykjumi, allskonar bakkelsi, kökum og tertum, ásamt fjölmiklu úrvali í veisluþjónustu sem er orðið gríðarlega vinsælt hjá þeim. Áherslan hjá Hérastubbi er að varan sé góð á bragðið, en ekki bara falleg að sjá þó svo að oft sé sagt að maðurinn borði fyrst með augunum. ,,Það er alltaf mikilvægt að varan sé bragðgóð og því nær maður fram með góðu hráefni” segir Hrafnhildur.
Fólk gerir sér ferð fyrir píturnar
Hrafnhildur segir að píturnar séu klárlega eitt af því vinsælasta hjá þeim, hvort sem það eru stór eða lítil pítubrauð eða þá mini píturnar sem að þau bjóða uppá fyrir veislur. Hún segist heyra mikið af fólki sem búi ekki hér í Grindavík, að það geri sér ferð til okkar til að kaupa pítubrauðin hjá þeim sem henni finnst einstaklega skemmtilegt að heyra.
Hverjir eru kostir við það að vera með stað í Grindavík?
,,Það er klárlega allt flotta fólkið hérna í bænum sem er virkilega duglegt að versla heima og við erum óendanlega þakklát fyrir það” segir Hrafnhildur. ,,Lítið fyrirtæki með stórt hjarta - lítill bær með stórt hjarta eins og pabbi segir” bætir Hrafnhildur við.
Vegan úrvalið í þróun
Hrafnhildur segir þau vera að þróa vegan úrvalið sem henni finnst alveg rosalega spennandi ásamt því að vera að koma með nýjungar í súrdeiginu. ,,Við erum alltaf eitthvað að fikta með það og reyna að finna meira nýtt og spennandi” segir Hrafnhildur.
Eitthvað fleira sem þú vilt koma á framfæri?
,,Menntun er máttur en pabbi er lærður bakarameistari og ég er lærður bakarasveinn, konditor og súkkulaðimeistari” segir Hrafnhildur. Ekki eru mörg lítil bakarí sem eru með svona mikla menntun á bakvið sig en Hrafnhildur segir vera virkilega stolt af því. Svo viljum við einnig minna á að hægt sé að panta í gegnum instagram og facebooksíðu Hérastubbs.
Afmælistilboð alla vikuna
Hérastubbur verður með afmælistilboð á hverjum degi út allan júlí mánuð frá 6.júlí sem er afmælisdagurinn bakarísins.
-Tilboðin koma inn á Instagram og Facebooksíðu Hérastubbs, svo það er um að gera að fylgjast með.
Staðsetning: Gerðavellir 19
Heimasíða: www.herastubbur.is
Opnunartímar: Virka daga frá 07:00-17:00, Laugardaga 08:00-16:00, Sunnudaga 09:00-16:00 (Lokað alla sunnudaga í júlí).
Sími: 426-8111
Myndir og umfjöllun eftir Láru Lind Jakobsdóttur