Vel heppnađur ţjóđhátíđardagur í Grindavík

  • Fréttir
  • 22. júní 2020
Vel heppnađur ţjóđhátíđardagur í Grindavík

Glæsileg dagskrá var í boði í Grindavík á þjóðhátíðardaginn 17. júní síðastliðinn. Mikil ánægja var með dagskrána meðal bæjarbúa og þótti hún takast einstaklega vel.  

Dagskráin byrjaði með 17. júní hlaupi á aðalvelli knattspyrnudeildarinnar og var hlaupið í hollum eftir aldri. Allir fengu pening en um var að ræða einn hring sem er um 400 metrar að lengd. 

Í kjölfar hlaupsins var haldið á æfingasvæðið austan við Hópið og biðu spennt börn eftir karamelluregninu sem hef er fyrir á þessum degi. Um 25 kíló af karamellum var kastað úr flugvél og óhætt að segja að allir hafi fengið sinn skammt af sælgæti. 

Milli klukkan 14:00 – 17:00 var svo hátíðaropnun í Kvikunni, menningarhúsi Grindvíkinga. Þar voru hoppukastalar fyrir börnin, Sirkus Íslands var á svæðinu, boðið var upp á að fara á hestbak fyrir krakka, krítar og húllahringir voru í Húllinu. Glæsilegar kaffiveitingar voru á staðnum bakaðar af Hérastubb bakara, Pop-up markaður var og er enn í Kvikunni, ljósmyndasýning Láru Lindar var til sýnis á efri hæðinni og nýtt líkan af Kútter Fríðu var til sýnis. 

Meðfylgjandi myndir voru teknar við Kvikuna og við íþróttasvæðið.  


 


Deildu ţessari frétt